पुणे : करोनाच्या पार्श्वभूमीवर देशभरात लॉकडाउन झाल्याने सर्वच प्रकारच्या उद्योजकांना मोठा आर्थिक फटका बसला आहे. अनेक लघुउद्योजक, छोट्या उद्योजिका यातून सावरण्याचा प्रयत्न करत आहेत. अशा छोट्या उद्योगांना पाठबळ देण्यासाठी उद्योजिकांच्या ‘घे भरारी’ या संस्थेने पाळंदे कुरिअरच्या साथीने अल्प दरात ‘डिलिव्हरी’ची व्यवस्था उपलब्ध करून दिली आहे. त्यामुळे पाळंदे कुरिअरच्या मदतीने उद्योजिका पुन्हा एकदा ‘भरारी’ घेण्यास सज्ज झाल्या आहेत.
या उपक्रमाचा शुभारंभ गुरुवारी (२८ मे २०२०) पुण्यातील कर्वे रस्त्यावरील पाळंदे कुरिअरच्या कार्यालयात चित्रकार व सामाजिक कार्यकर्ते धनंजय देशपांडे यांच्या उपस्थितीत झाला. या वेळी पाळंदे कुरिअरचे आशिष पाळंदे, ‘घे भरारी’चे राहुल कुलकर्णी, नीलम उमराणी-एदलाबादकर आदी उपस्थित होते.
नीलम उमराणी-एदलाबादकर म्हणाल्या, ‘महिला व लघु उद्योजकांना प्रोत्साहन देण्यासाठी दर वर्षी ‘घे भरारी’ या महोत्सवाचे आयोजन केले जाते. २०० ते ३०० उद्योजिका या प्रदर्शनात सहभागी होत असतात; मात्र यंदा करोनामुळे हे प्रदर्शन घेता आले नाही आहे. त्यामुळे या महिलांना मोठा आर्थिक फटका बसला आहे. त्यांना एक व्यासपीठ उपलब्ध करून देण्याच्या उद्देशाने पाळंदे कुरिअर यांच्याशी समन्वय साधून त्यांच्या उत्पादनांना ग्राहकांपर्यंत पोहोचविण्याचा प्रयत्न आहे. करोनामुळे अनेकांच्या नोकऱ्या जात आहेत. अशा वेळी या महिला छोट्या उद्योगांतून आपल्या घराला उभारू शकतात. मास्क, सॅनिटायझर, खाद्यपदार्थ, गृहसजावटीच्या वस्तू, हस्तकला, रेडिमेड पदार्थ, डिझायनर ड्रेसेस, हर्बल प्रॉडक्ट्स, आयुर्वेदिक औषधे, लाइफ इन्शुरन्स, होम ऑटोमेशन, घरगुती अत्तरापासून ते कलात्मक वस्तूंपर्यंत, हँडमेड दागिन्यांपासून खेळणी आणि इतर घरगुती उत्पादनापर्यंत सगळे काही ऑनलाइन मागविता येणार आहे.’
धनंजय देशपांडे म्हणाले, ‘करोनामुळे सगळ्यांचेच कंबरडे मोडले आहे. अशा वेळी मराठी उद्योजक एकत्रितपणे हा चांगला उपक्रम राबवत आहेत. याचा अनेकांना फायदा होईल. अधिकाधिक उद्योजकांनी यात सहभागी होऊन ‘डिलिव्हरी’ची व्यवस्था पाळंदे कुरिअरवर सोपवावी व आपण आपल्या उत्पादनाच्या मार्केटिंगवर भर द्यावा, जेणेकरून व्यवसायवाढीसाठी त्याचा उपयोग होईल. यातून नोकरीच्याही अनेक संधी निर्माण होतील. त्याचाही लाभ मराठी तरुणांनी घ्यायला हवा.’
आशिष पाळंदे म्हणाले, ‘कुरिअर सेवा देण्याची आमची ५० वर्षांची परंपरा आहे. आता या करोनाच्या संकटातून पुन्हा एकदा भरारी घेण्यासाठी अनेक छोट्या उद्योजकांशी संलग्न होऊन त्यांना अल्प दरात कुरिअर सेवा पुरवण्याचा प्रयत्न आहे. पुण्यासह ग्रीन झोनमध्ये ६० रुपयांऐवजी ३५ रुपयांत ही कुरिअर सेवा उपलब्ध होणार आहे. पुढील प्रत्येक किलोसाठी १० रुपये शुल्क आकारले जाणार आहे.’
‘करोनाच्या पार्श्वभूमीवर कुरिअर सेवा देताना सुरक्षेची सर्व काळजी घेतली जाणार आहे,’ असेही त्यांनी सांगितले.
या सेवेचा लाभ घेऊ इच्छिणाऱ्या उद्योजिकांनी पाळंदे कुरिअरच्या स्थानिक कार्यालयाशी संपर्क साधावा, असे कळवण्यात आले आहे.
